عندي مشكلة كبيرة قالبة حياتي رأسا على عقب

المشكلة مش متخيلة الحياة من غيره بردو هو ليه موقفين كان جدع جدا فيهم أولا تعبت تعب غريب حير الأطباء كنت بفضل دايخة ومكسرة طول اليوم قعدت على كدة ٣ سنين لف معايا مصر كلها على أغلى الدكاترة وجميع التخصصات الطبية وتحاليل وأشعات بالهبل دون جدوى كله بيقول مفيش حاجة لكن اللي كان مصبرني شوية بعد إيماني بالله انه كان محتويني وداعمني جدا ويقولي متعمليش حاجة انا هجيب شغالة تعمل ونحاسبها عادي ونجيب أكل جاهز ايه المشكلة لحد ما تبقي كويسة لحد ما هو قالي أنا هحججك يمكن ربنا يشفيكي وباع عربيتنا وحج معايا طبعا علشان يكون محرم لي رغم انه حج قبل كدة واتكلف حجنا احنا الاتنين حوالي ١٧٠ الف في ٢٠١٩ وشاف المرار معايا هناك كنت بتعب يفضل يجرني على كرسي ٨ كيلو اللي هو جسر الجمرات لدرجة الناس كانوا فاكرني أمه ولما بابا الله يرحمه تعب التعب اللي ماټ فيه كان واقف معاه مبيسيبوش نهائي ويشيله ويوديه المستشفي ويقعد معاه مرافق بالأيام رغم ان اخواتي كانوا بيتحججوا بالشغل وفي اللي كان بيقول على بابا هو اللي عمل في نفسه كدة من اللي كان بيشربه !!
أنا في مصېبة حقيقية اكتشفت ان كل دا كان تمثيل ولا بيحبني ولا حاجة وعمر ما زوج بيحب مراته يتجوز عليها
هو لسة متنيلش بس بيقولي انا ممكن أوقف الموضوع علشانك لكن هتبقي ظلمتيني لأن دا حقي وقالب وشه طبعا

المشكلة ان البنت أصغر منه ب١٢ سنة وبنت متزوجتش قبل كدة ربنا ينتقم منها ومن كل واحدة عايزة تبني سعادتها على أنقاض سعادة امرأة أخرى بنات دماغها خربانة عيلة لسة عندها ٢٤ سنة ومش وحشة على فكرة ايه اللي يخليها تقبل بوضع زي دا بواحد متجوز وعنده ٣ عيال وعايش حياة هادئة وسعيدة مع مراته
أنا لما كنت بقول لجوزي دا نفسي أرد جمايلك عليا عاوزة أروح لامك اعملها الشقة والأكل لأنها تعبانة النهاردة بيرفض ويقولي أمي انا اللي هتسأل عليها قدام ربنا مش انتي وساعات كان بيجيبلها واحدة تشتغل عندها على حسابه هو ويقولي روحي اعملي لامك انتي هي اولى بصحتك يعني ييفهم اهو ازاي يعمل كدة بقى وازاي عايز يكسر قلب واحدة بقالها معاه ١٤ سنة كنا على قدنا خالص وربنا كرمنا من وسع ليه الافترا على خلق الله
بدون تجريح من فضلكم اعمل ايه