واحدة جارتنا جوزها اترقى في وظيفة فعامله عزومة للعمارة كلها
لكن المراعي او لاكتيل مافيهوش الطعم اللبني ده اوي.. فكان من الصح تكسري طعم اللبن ده بشويا قرفة او زنجبيل..
قالتلي وايه كمان.. ووشها احمر.. وأمي اتضايقت مني أوي..
قلتلها واللي يفرق الوايت صوص عن صوص البشاميل العادي هي البهارات الايطاليه اللي هي الريحان او الاوريجانو.. لارم يا طنط تحطي ريحان في الصوص عشان هو ده اللي بيدي طعم الصوص.. وكمان مافيش مرقة دجاج.. صح
قالتلي صح..
ولسه جاي أكمل.. لقيت الست بكل أدب اتضايفت مني أوي وقالتلي ما تكملش أكل المكرونة يا بشمهندس.. طالما هي وحشة أوي كدا.. وقلبت وشها..
وقالت لأم يكون في عونك.. وبصت لعماد وقالتله هي المكرونه وحشه أوي كدا يا استاذ عماد.. قالها والله ده أكل كانه جاي من الجنة.. أنا في حياتي ما دقتش في حلاوتها ده لازم تعلميها لمراتي..
فأمي بتقولها عايزين عروسة لأحمد ابني.. قالتلها والله لو آخر واحد في الدنيا ما هأكله تاني ولا همشيله في حاجة.. وبصتلي وقالتلي ابقي فرجني على أكلك يا أحمد.. وابقي وريني مين هترضى بيك وانت كدا..
أمي قاعده مصدعة دماغي ازاي تحرج الست كدا في بيتهم.. اقولها خيركم من اهداني عيوبي يا ماما.. تقولي خيركم من حط شبشب في بؤقه وهو عند الناس..
بقول لعماد أخويا.. الناس بتتقبل انك تكون وغد مجامل.. على أن تكون محترم وصريح.. قالي المسمار القلاووظ بيفوت أسهل من المسمار الصلب عشان بيلف مع الخشب ما بيكسروش..
قالي إوعي لما حد يسألك عن رأيك في أكل تقوله رأيك.. قلتله أومال بيسألني ليه.. قالي عشان تقوله حلو..
وخبطني على دماغي وقالي عشان كدا قلتلك لازم نجوزك.. عشان مراتك تحرمك تقول رأيك في الأكل.. مفيش راجل بيقول رأيه.. بنقول الله الأكل تحفة.. مفيش راجل متجوز بيقول رأيه في الأكل ياحمد..
