واحدة جارتنا جوزها اترقى في وظيفة فعامله عزومة للعمارة كلها

مكرونة وايت صوص

واحدة جارتنا جوزها اترقى في وظيفة فعامله عزومة للعمارة كلها وعاملين جو حلو أوي سوا.. والست مش جايبه أكل من برا عاملة كل الأكل بإيديها وقالت لنا يا جماعة اللي ياكل يقول رأيه..
لقيت ماما واخواتي وحتى عماد قاعدين يشكروا في الأكل وقد إيه هي جمدان وتسلم إيديها ..
الست كانت عاملة كفته رز ومحشي وفراخ وصواني في الفرن ومكرونة وايت صوص..
فأنا أول ما جيت أكل حطيت الشوكة في المكرونة وكانت بالوايت صوص واللي ما يعرفش الوايت صوص صلصة بيضا لبن وكريمة طبخ وشويا دقيق..
أول ما دقتها حسيت إنها مش شاطرة في الطبخ خالص.. فسكت وقلت ياض يا أحمد جامل زي اللي بيجاملوا..
وقلت في نفسي..
أحسن إلي الناس تستعبد قلوبهم.. لطالما أستعبد الإنسان إحسان
فقلتلها يا طنط جميلة والله بس فيه شويا تركات كدا في المكرونة لو هتعمليها وايت صوص..
أمي باصتلي بعينها بصة.. لا.. اطفح وانت ساكت.. لا..
وعماد قالها سيبك منه والله ما بيفهم في الأكل..
الست قالت ما تسيبوه يا جماعة ده انا بحب البشهمندس والله.. هما بيعاملوك ليه كدا يا بشمهندس.. ده عروستك عندي والله.. مالها المكرونة..
قلتلها يا طنط فيه فرق بين المكرونة الحمرا والوايت صوص.. نوع المكرونة ما ينفعش يبقي الملكة او اي نوع رخيص.. ليه بقى..
عشان النوع بتاع الملكة ده بيستوي بسرعة حتي لو اتعمل نص سلقة.. وبعدين بينزل في اللبن فيتهري.. الأحسن تجيبي نوع اسمه ستار أو مصرية او روجينا لأن القصة والطول بتاعة المكرونة نفسها أطول من الملكة فبتحافظ على قوامها.. وأنا عن نفسي بستعمل ستار عشان ارخصهم..
قالتلي وعرفت منين ان دي مكرونة الملكة يا بشمهندس.. قلتلها طول التجربة يكسبك الخبرة.. المكروانيه مهرية جوا اللبن وقصتها صغيرة مش زي بتاعة المطاعم..
وبعدين قلتلها تاني حاجة انتي زودتي لبن ودقيق في الوايت صوص عن كريمة الطبخ واستخدمتي نوع لبن ليه طعم لبني أوي أكيد ده جهينة..