متجوز بقالى شهرين
الانسة حنفي
متجوز بقالى شهرين ومراتى ١٩ سنه وامبارح عملنا تيست حمل والمدام حامل اللهم بارك وهى حاطه ايديها ورا ضهرها زى فيلم الحفيد
وعامله فيها حامل ف التاسع وبتتالم مالك يا بنتى انتى كويسه تقولى الواد بيزق برجله جامد وانا اضحك المهم رحنا كشفنا انهارده عشان نتابع الدكتور قالت اول اسبوعين وكده والدنيا تمام الحمد لله وهى داخله للدكتوره بنفس المنظر ده اكيد متخيلين وانا واقع عالارض م الضحك اقولها ما تأڤوريش وهى تقولى مانت السبب اضحك اضحك وربنا لأوريك
المهم الدكتور قالت لها لازم تتغذى وكده وكتبت على شويه حاجات ومثبتات للجنين ماشى تمام وأنا بليل واقف ف المطبخ بشرب القهوه وهى نايمه وعامله نفسها بتولد وتتألم ف الاوضه
وحسيت بالجوع وكان عندنا نص بطايه وشويه مكرونه قولت افتح التلاجه اسخنهم واتعشى بقا بفتح التلاجه لقيتها خاويه على عروشها فاضيه تماما فيها ازازه ميه وعيش وجبنه وخياره ونص لمونه
ف رحت ليها قولتلها فين الاكل اللى كان ف التلاجه قالتلى كلته قولتلها كلتى نص بطايه ونص صينيه مكرونه يا مفتريه قالتلى وربنا كونت جعانه والدكتوره قالتلى اتغذى كويس قولتلها تاكلى اكل يكفى اربع أنفار انتى ايه دانتى حامل ف أسبوعين امال لو حامل ف السادس هتعملى فيا ايه هتسلقينى وتاكلينى
هو استفسارى دلوقت ده بجد أنا عمال اكلم الدكتوره ولقيتها عماله تضحك عليا وقفلت ف
وشى وتقولى والله مراتك دى عسل
